Аннотация

У артыкуле прааналізаваны асноўныя тэндэнцыі развіцця рэпертуару выданняў для дзяцей сярэдняга і старэйшага школьнага ўзросту. Аб’ектам даследавання сталі кнігі, выдадзеныя беларускімі выдавецтвамі з 2015 па 2020 г.

На думку аўтара артыкула, у апошнія гады пісьменнікі менш увагі надаюць праблемам, звязаным з захапленнем дзецьмі камп’ютарам. Узрасла цікавасць аўтараў і выдаўцоў да філасофскіх тэм, да стварэння твораў для ўсёй сям’і (З. Камінская «Калядны стол», А. Хадановіч «Нататкі таткі»). Актыўна пішуцца творы на тэму беларускай гісторыі і міфалогіі (фэнтэзі К. Шталенковай «Адваротны бок люстра», А. Шэіна «Сем камянёў», А. Длатоўскай «Арнаменты»; кніга-квэст К. Хадасевіч-Лісавой «Ключ ад Вялікай Каштоўнасці» і кніга-перакрутка гэтага ж аўтара «Жахліўчык пра трох сяброў і прывід з хутара. Жахліўчык пра жудасную ноч і чатырох сябровак»).

Актыўна ствараюцца кнігі з дадатковай рэальнасцю, якія значна пашыраюць магчымасці папяровага выдання. Некаторыя выданні праектуюцца так, што афармленне старонак візуальна нагадвае экран смартфона ці планшэта (Я. Малішэўскі, А. Спрынчан «Малочны кактэйль для Вужынага Караля»).

Аўтар робіць выснову аб тым, што пісьменнікі і выдаўцы шукаюць новыя формы падачы твора і фарматы зносін з чытачамі, ствараюць крэатыўныя графічныя мадэлі выданняў. А змест сучасных кніг для падлеткаў, як правіла, заснаваны на беларускім нацыянальным матэрыяле.